Silvretta-Woche

S'Berg-Highlight in den Johr wor mit Sichoheit die Woche in do Silvretta. Nebm an intressantn und intensivn Kurs ibo Projektmanagement hobm do Walter und i jeda freia Minuta außa gequetscht, um die Berge um die Bieler-Höhe zi erkundn.

Hohes Rad (2.934 m)

18.07.2006 - mit Walter. Kaiserwetto! Um holba6a gstartn, damitmo rechtzeitig zin Seminarunfong um 9a wiedo hinto sein ... :-) So hobmos ins ausgerechnt, obo es wor aanfoch ze schian, um in gleichn Wäg wiedo hinto zi giahn, so hobmo in Rundwäg gemocht und ins la um a Viertlstunde vospätn. Af do Sunnenterrasse im Silvrettahaus hobmo no bärig gformast.

---

Vallüla (2.813 m)

19.07.2006 - mit Walter. Wiedo Kaiserwetto und desmo schun um 5a gstartn, damit mo jo pünktlich ban Seminar sein. An wundoschian Sunnenaufgong, Staanbecke gsächn, a tolla Aussicht van Gipfl und desmo rechtzeitig ban Kurs.

---

wiedo Hohes Rad

20.07.2006 - mit Walter, Horst, Georg und Clemens. Longweilig, schun wiedo Kaiserwetto :-) Do Kurs isch den Tog af do Wiesbadnerhitte gewessn und so hobmo kaan Genäat ghob.

---

Piz Buin (3.312 m)

22.07.2006 - mit Walter. Des wor inso Hauptziel fi de Woche und es isch absolut unvogesslich gewessn. Vorn Piz Buin sanmo baada no nia af an Gletscha gewessn und desweign hobmo ins an Bergfiahra reserviert; in Edwin, an volle simpatischn Kerl! Die gonze Woche Kaiserwetto und in Freita um droi nummittog, bol di Kurswoche umma isch, schiffts und wettorts. Dorf des meiglich sein? Gegga! Jojo, so sanmo zerschtl amo ochn Galltür um an Hittnschlofsock und Vopflegung zi kaafn, nocha sanmo wiedo augn af die Bielerhöhe und hobm gewortn ... daßz aushersch zi schiffn und zi wetton. Noch 5a sog ins do Hittnwirt am Telefon, daßz obm wiedo hella wersch und bol do Rägn awin nochgelossn hot sanmo gstartn.

Baada norweis (i wiedohol mi: no nia af an Gletscha, i a no nia in an Hittnlogo ibonochtn) und hinton Silvretta-Stausea begegn ins a poor Leit mit Bergfiahra ... der schaug aus wia do Edwin afn Prospekt. Ungsprochn: er ischs! Und der hot sofl a Ruhe ausgstrohlt, daß di Nervosität af do Stelle voschwundn isch.

Af do Wiesbadnerhitte hobmo no an schian Sunninuntogong gsächn. Weignin letzn Wetto san ziemlich wianig Leit af die Hitte gong, so wors Logo foscht laare und mir hobm a ruhiga Nocht ghob (do Walto hot gsog i hat gschnorcht).

In Somsta ischs Wetto guit gewessn (et sofl kaisolich wia die Toge dovor, obo guit) und mir hobm a tolla, gemiatlicha Gletschatour gemocht. Des wor a traumhoftis Erlebnis!