Foto-Albm 2009 - Teil 1
Gassen im Defereggentol
A Summo-Bluim-Wondrung
01.06.2009: In die leschtn Weihnochtsfeirtoge hon i af 3sat a Dokumentation ibo a Familie va Gassen gsächn, do wos die Katastrophe 1965 mitdoleb hot, wo a Mure mitn durchn Weiler durch isch und 2 Heiso und 6 Menschnlebm ausgelescht hot.
So saanmo heint amo ibon Stollasottl ins Defreggntol gfohrn. Va Feld augn ibo an nettn Woldweg noch Gassen. Kurz dovor ban an Brechelloch vobei, wou se friah in Flochs gebrotn hobm.
In Gassen selbo scheint heint kaans me zi lebm... itz wo a Stroße augn get. Friah wou se aana gebraucht hatn, hots kaana gebm. Itz durch die Stroße hot der Weila fi mi an Flair volorn, den i mo aus der Dokumentation (ca. 2000 gedrahnt wordn) erwortn hon.
Donoch seinmo weita - olm entlong va wundoschiana Bluimwiesn - noch Gritzen und wiedo ochn af Feld. Inmittn va die Wiesn, viel schiana olta Berghöfe. De Wondrung (und a awin weita) konn i jedn empfehl!
Via 46° parallelo
Pietramurata
18.05.2009: Gschofft! :-) Schun a Woche dovor san do Walter und i dohin. Die roata Schrift ban Einstieg hobmo gor et suichn gemiaßt, weil die Route vor ins genau (!) in Foto van Klettofiahra entsprochn hot. Noch do erstn Saallänge hobmo no ogsaalt und festgstellt, daßmo in do Manilia worn (1 Route zi weit rechts - Klettofiahra eindeutig folsch!).
Desmo hots reibungslos gikloppn; mir sein a zem gstartn, wo dick und groaß und roat "via 46° parallelo" steaht. Do Walter hot in Vorstieg souverän gemocht und i hon mi dohinto gonz wohl gfühlt.
Aufhofen - Kofl
Do Langis erreicht Pustotol
19.04.2009: Do Tog hot mit blaun Himml und Sunne ungheb und donoch ischs decht schnell no wolkig und kuihle wordn. Oboholb va Aufhofn afn Kofl war die Sunne zwor fein gewessn, sie hat ins gekennt die Staane wärm, af de mo nocha hattn kenn genüßlich die mitgebrochte Schokolade voschling bzw. lutschn ... schluß mit Traam :-)
... es wor a win windig und so hobmo ins bold wiedo ans Owärtsgiahn gimocht. Schau amo des netta Paarl: die frische giane Trauerweide und do junge knackige rosa B..Baam (wosfraando, wass i et).
Oaschton am Gardasea
Malcesine
11.04.2009: Mir sein afn Morkt noch Malcesine. Es wor et gonz sofl worm, wia die Bildo vomuitn lossn, obo sobold sich do Wind awin zrugghgoltn hot, wors fein.
Währnd die Damen und Kindo durchn Morkt sein, hobm mir "Herrn" s'ins af do Terrasse ban an Kaffää gemiatlich gimocht und die Sunne genossn.
Valle delle Cartiere - Papiermühlental
12.04.2009: Va Toscolano-Maderno sammo ins Valle delle Cartiere gstartn. S'Tol isch voll va Ruinen va olta Papiermühl. Laut an Internetsuiche isch in den Tol schun seitn Mittlolto Papier gimocht wordn. Die itz no sichtborn Ruinen solln va die leschtn Fabrikn ausn 19. Johrhundort stomm.
Hintowärts seimo af Gaino gong, hobm sem inson Durst gstillt, vobei an an nettn Eisl (der onscheinend a Woche dovor sei Muito volorn hot) und wiedo hinto.
Castel Beseno
13.04.2009: Af inson Haamweg hobmo Castel Beseno besichtigt. A groaßa beeindrucknda Festung. Aandoseits ischs schode, daß do Zohn der Zeit (wirklich viel Zeit) sofl dron genogg hot, ondodoseits ischs erstaunlich, daß oft decht bestimmpa Klaanigkeitn sofl guit erholtn sein, wia z.B. die Wondmohlerein.
In do Osteria Rupe di Beseno hobmo donoch no fein Mittog gessn und donoch ischs wiedo gen Nordn gong.
Groaßo Jaufen
Progsa Wildsea, Roßolbe, Briggile
24.03.2009: Die Theresia, do Walter und i hobm wiedramo blau gimocht und sein ins Weiße gstartn. Währnds in Boazn schun richtig Langis isch (in Tog dovor bin i sem ba 19° in die kurz Hosn afn Rittn gong), sammo in Progs in tiafschtn Winto.
In do Friah hots wilde ausgschaug ... Wolkn und gschniebm hots, obo es hot sich bold amol zin Bessan gewendit, außo do Wind, do se hot ins et volossn. Gewaltig hotta afn Gipfl und ban Obstieg af die Roßolbe geblosn - awin siechtmans af die Foto.
Gstartn sammo ban Progsa Wildsea. Teilweise hats foscht Steigeisn gebraucht, weilmo mit die Horscheisn unto die Schneaschuiche (af guit deitsch: Tschaspole) an die Grenzn kemm sein. Obo mir sein guit augn kemm. Obm hobmo a gewaltigis Panorama genossn ... undn Wind :-)
Screen-Shot ausn Google-Earth. Wenn man genaua schaug, siecht man guit, daß "inso" Wintoweg teilweise gor awin van Summoweg oweicht.
Medalges-Olbe
20.03.2009: Endlich wiedramol a Tour mitn Jürgen. Hinto Campill seinmo augn gong in Richtung Kreuzjoch. Im Südn begleitn va die Puezspitzn, Piz Duleda und vor ins do Wossokofl. In Summo 2000 sammo a ibo des Tol inne und hint ibo die Wossoschorte ibo, ochn zi do Regnsburgahitte, usw.
Obo do Woldgrenze hot do Wind gonz schian gepfiffn und mir hattns gschätzt, wenn die Hitte obm offe giwessn war, odo dem wor leido et so. Do Termometto nebm do Haustiar hot -9° ungezaag und so hobmo ins truckn und worm ungelegg und sein mit insra Becklan owärts gstartn und hobm die Pause bana ondon Olmhitte awin im Windschottn gemocht. Wenn man longe nimma becklt, nocha werdn die Fiaße schnell schware (wia haaßts? wos man et im Kopf hot, hotman in die Fiaße ... sanse desweign sofl schware?).
Screen-Shot ausn Google-Earth va insodo Tour af die Medalges-Olbe. Do holt uhne Schnea :-)
Rabenkopf
01.02.2009: Eigntlich missat i wo Roppnkopf sogn, obo weil der Gipfl in Bayern isch, bleibmo neutral ... odo sogn 'Robnkopf', wia man sem sogat.
Schianstis Wintowetto, in die Häachn viel Schnea und aanfoch bärig.
Afn Foto rechts isch die Benediktnwond im Ostn zi sächn, drunto do Roppnkopf van Vorgipfl aus gsächn und donebm a Blick noch Westn: links do Jochberg, donebm Herzogstond, Heimgortn und unte do Kochelsee.
Do isch die Tour af Google Earth sichtbor.
Burgenrunde
Boymont - Hocheppan
21.03.2009: In Überetsch hot do Langis - wia olm - an ordnlichn Vorsprung. Es griant schun recht schian, und bliaht olwa mehra ... la do kolte Nordwind erinnort no an in Winto. Mit do Petra, in Flori und do Mamma hobmo an nettn Spaziergong gemocht van Schloß Korb augn Boymont, ibon Steig umme Hocheppan. Sem sein ins ban a Fiahrung die Molerein in do Schloßkapelle dokläart wordn - höchstintressant.