Foto-Albm 2009 - Teil 2
Radlsea-Lauf und Königanger
Berglauf und Wondrung
18.10.2009: Insra bisherigin direktn Duelle (drei mol Drei-Zinnen-Lauf und do Firmenlauf in Neumarkt) hot olla do Walter gewunn. Desmol bin i amol do Schnellare gewessn :-)
Die Kälte hot ins in do Friah schun awin doschreckt, obo in Garn wor die Tempratur decht a Spur häacha as wia im Tol und a biß eppas hot die Sunne a nou beigetrogn.
Kaum in Ziel, seinmo relativ schnella olla in die Radlsea-Hitte inne. Normaloweise bekonnt fi die Kneidl, hot die Rennteilnehma a gigantischo Nudltalla erwortn, dem mir obo et recht gewochsn worn - zi viel und zi friah.
Donoch seinmo weita afn Kinigonger, wo mo ins weign in koltn Nordwind et long augholtn hobm. Untowegs in Richtung Klausner-Hitte hobmo die schiana Aussicht genossn und die Dolomitn hobm ihra Gipfl in die Schneawolkn vosteckt.
Ritten
Aktuella Zohln und Rekorde
21.10.2009: Seitn 08.10.2009 isch do Rekord af insodo Rennstrecke mein. Ollodings isch zi befürchtn, daß des et long asou bleibm wersch.
Vor an Munat hot do Walter groaßa Töne gspuckt, daßa sein Rekord innoholb Oktobo "signifikativ" (!) vobesson will. Mit meindo Vobessrung hon i'n itz ordnlich provoziert und ungstichlt, desweign werds woll et long asou bleibm. Schaugmo amo, do Oktobo hot no a poor Toge :-)
Aktuella Bestzeitn (Onzohl Rittngänge):
- Walter: 42:40 (732)
- Martin: 42:35 (628)
seit 30.10.2009: 42:15
Rosengartenspitze (2.981 m)
Aufstieg ibon Normalweg (bis III+)
23.09.2009: S'Wetto hot et des gholtn, wos die Prognosn vosprochn hobm. Die Aussicht afn Gipfl wor awin beneblt, obo ba ongenehmo Tempratur.
Ban Aufstieg hot ins a sympatischa Saalschoft aus Bayern begleitn. Afn Gipflfoto sein die Bergfüchse Sepp und Ernst (76) mit mir zi sächn. Mir wünschn ihnan no viel schiana Bergtourn und vor ollem a guita Gsundheit!
Afn nächstn Foto isch do Walter schun ban Osaal ibon Kamin.
Heilig-Kreuz
A traumhofto Herbsttog
03.10.2009: A Herbsttog wia im Bildobuich: die Wiesn sein no grian und die Baame und Streicho zaagn erschta Vofärbungen, die Olmwiesn van Vieche zuign gfressn, Herbstzeitlosn bliahn und sischt nimma viel, die Aussicht genial, in die Häachn spielt do Wind mit a poor Wolknfetzn und drunto ischs richtig ongenehm und fein worm in do Sunne. Und Leit sein a la gonz wianig untowegs gewessn.
Dobei hot mi einigis an die Tour va 2003 mitn Walter und Julius erinnort - s'Wetto wor sem gleich schian.
Hochfeiler (3.510 m)
Mei bisher häachsto Berg
08.09.2009: Den Tog hobmo supo dowuschn: es wor nimma sofl kolt, wia die Toge dovor, obo die Sicht olm no ausgezeichnet, wenn a schun a bißl dunschtig geign Südn hin. Die Petra, Rosmarie, Theresia, do Walter und i sein va Pfitsch aus gstartn.
Af do erschtn Hälfte van Austieg wors gor a win windig und kolt (ban Gewondt sicht mans zwor la mir un), obm augn ischs nocha ongenehma wordn.
Und je weita daßmo augn kemm san, desto weita hobmo gsächn. Wuaaa, richtig bärig!!! Beeindrucknd san die Gletscha und vor ollem die steiln Flankn auf do Nordseite. Kaum zi glaabm, daßz a Leit gib, de va sem aua kemm.
Ibon Grad augn gibs amo awin ondra Staanemandlan: es gib jede Menge Staanplottn und ziemlich a poor dovon sein augstellt, wia Grobstaane.
Owärts hobmo ba do Hochfeilerhitte an Stop gemocht. Leido hobmo et dron gedenkt, daß ins do Artur no a poor Toge dovor vorgschwärmp hot, wia groaßa und guita Wianaschnitzlan es do gib. Pech ghob, miaßmo hot no amol augn :-)
Mühlbocha Talile
Kaiserwetto noch Unwetto
05.09.2009: Kaum zi glaabm: in Tog dovor hots in groaßa Taale va Südtirol gewaltiga Regnfälle und Murn gebm und den Tog wors traumhoft schian, wenn a no awin kuihle.
In die Häachn hots ocha gschniebm und afn Woldbodn hot man sogor in Nummittog no Schaurkugilan gsächn, wia af den Bild. A poor Sunnstrohl de durch die Baame kemm und gonz bärig is Mous und die Eiskugl unstrohl.
Ferner Köpfl (3.251 m)
Foscht wars do Schneabige Nock wordn, obo la foscht
30.07.2009: Am Ende va meindo erstn bärigin Urlaubswoche sanmo mitn vorsichtigin Ziel "Schneabigo Nock" gstartn. Weil i kaana Steigeisn hon und do Walter mit mir solidarisch gebliebm isch und a nicht mitgenumm hot, isch vor an leschtn Eisfeld Sense gewessn. Obo isch et tragisch, bis sem hin ischs a richtig bärig gewessn und s'Ferner Köpfl isch schliaßlich a a richtigo hoacho Gipfl.
Zwischn Ferner Köpfl und Schneabign Nock gibs no a netta Klettrerei, de perfekt mit a Kette ogsichort isch.
Rechts ischs'Ferner Köpfl zi sächn, links dohinto do Mogostaan ... Magerstein fi ortsunkundiga :-)
Plätzwiese-Roßolbe
"Muttertag" :-)
29.07.2009: Ba herrlichn Wetto und ongenehma Tempraturn sein do Walter und i mit insra Mammas va do Plätzwiese af die Roßolbe gewondort. Wärnd af do Plätzwiese a mords Trubl isch, ischs af den Weg recht gemiatlich und so hobmo uhne Genäat die Aussicht und die schian Bluim geniaßn gekennt.
Af do Roßolbe hot ins nocha do Herbert guit bekocht und währnd mo die Roscht ginossn hobm, hotta ins a awin eppas dozeihlt. Donebm in do Hundehitte isch aando gelegn, der wedo "woch" no "Hund" isch, obo sich dorin sichtlich wohl gfühlt hot.
Lippella-Klettersteig
af die Tofana di Rozes (3.225 m)
28.07.2009: Do Lippella-Klettosteig fahltmo jo schun fost seit Johrzehntn und itz honni endlich amo Gelegnheit ghob, den mitn Walter zi mochn.
Nochdem in do Friah no kurzis Wetto ibos gonze Lond gizochn isch, hobmo ins geign Mittog (ba strohlndn Sunnenschein) afn Weg gemocht, obo in do Cortinageignd hots glei nimma sofl guit ausgschaug. Obo s'Wetto hot decht gonz guit gheb. Noch an Wetto hots nimma ausschaug, obo evtl. noch Regn und der isch gaaling a kemm, obo zin Glick et zi friah.
Wia's do Zuifoll will, hobmo afn Zuistieg zwa Polen getroffn, do wos in Tog dovor hinto ins die erste Route geklettort sein. Donoch im Castelletto-Stolln ischs gonz schian finsto gewessn. Uhne Lompe war man sem ziemlich augschmissn - meina hot wenigstns a bißl geleichtn :-). Donoch fong do Klettosteig kurz un, nocha gets ibo a Schoudobandl weita, wiedo Klettosteig, wiedo Schoudobandl, usw. Richtig a bärigo griffigo Fels, wo man - wenn man sich genui Zeit nimmp - a guit saubo kletton konn, uhne s'Saal zur Hilfe zi nemm.
Kurz vorn Gipfl - s'Kreiz hobmo gsächn - hobmo ins wettobeding entschlossn umzidrahn. Ban Obstieg af die Giusani-Hitte wars a Puff, wenns durch Regn zi rutschig odo durch Nebl schlechta Sicht wurat. A bißl noß wordn sanmo owärts zwor, obo et schlimm und zilescht isch sogor wiedo die Sunne kemm.
Groaßa Windschar
A herrlicho Aussichtspunkt af 3.041 m
27.07.2009: Die kurzfristig genummne Urlaubswoche hat et schiana unfong gekennt, as wia mit an sellan Tog. Jedn Tog ban Haamfohrn siech i die Windschar und desweign ischse itz fällig giwessn.
S'Mühlbochatalile allan isch schun empfehlnswert mit de bärigin Olmwiesn und den vieln Wosso, wos va ibro her kimp. Wia man nocha awin augn kimp, tian sich gewaltiga Blicke au: als erstis in Heilig-Kreuz-Kofel und die Marmolada und donoch siecht man gaaling in Rest der Welt. Ibozeig enk selbo!
Und wos olm erstaunlich isch: a in de Häachn woxn olla meiglichn Bluim (de af circa 2.800 m).
Cinque Torri - 4. Turm
Klettorn
27.07.2009: Währnd i no va do Windschar ocha geah, kimp an SMS van Walter: und itz oa, roschtn und numittoug 5 torri! Gsogg ... äh gschriebn und gitun.
Ibon schiafn Turm isch insra 1. Route gong: die erste Saallänge vor schräg links augn unto di ogebrochne Kante. Donoch no 2 Saalläng ibo die linke Seite gonz augn. Va sem hobmo ins aanomo ogsaalt und sein nocha ibo Turm links in 2 weitra Saalläng gonz augn. S'Osaal wor nocha recht lustig, bsondus gonz unte, wos zwischn de 2 Tirme durch a Loch noch unte gong isch.
Im 2. Bild isch die Tofana di Rozes zi sächn: inso Ziel am Tog donoch.
Col di Lana
Blumenwiesen af an Kriagsschauplotz
25.07.2009: Los sanmo van Schloß Andraz (südlich van Falzaregopoß). Donebm lieg a romantischo olto Weiler inmittn va schiana Olmwiesn und va sem weita ibo an nettn Woldweg und donoch ibo wundoschian bliadnata Olmwiesn augn Richtung Col di Lana.
Heintzitoge lieg olls a so friedlich do. Fi insoaans ischs kaum vorstellbor wia's do vor ibo 90 Johr im Erstn Weltkriag zui gong isch. La aus Dokumentationen kenn i awin eppas, wos die Soldotn do mitgemocht hobm. A klaana Kapelle und a Mahnmol (es stellt Körpa und Körpateila dor) errinnorn an den sinnlosn Kriag.
Heint sein die Wiesn mit viel voschiedina schiana Bluim ibosahnt und mittlt drinne liegn a a poor Zirmtschurtschn dummedumm. A poor san va die Aachalan schun fertig ausgenogg (schaug fost wia a offns Wespnnest aus) und die ondon wortn no drau.
