Foto-Albm 2010
Miniwundowelt
"magischa" Pilze
20.11.2010: Unglaublich, wia an die Natur olm wiedo zi iboroschn vomog. Mit an glücklichn Blick fi s'Klaane und a poor Sunnenstrohln in an graun koltn Herbsttog, zaagn sich sella Wundo.
Großer Moosstock (3.059 m)
Ibo die Wolkn ...
06.10.2010: Af die Spurn van Hans Kammerlander seinmo va Fochina afn groaßn Moosstock gstartn. In Unfong no im Nebl und bolmo zi die Schlofheiso kemm sein, obo do Nebldecke und unto an traumhoftn blaun Himml.
Do leschte Taal van Aufstieg wor ziemlich noß und rutschig und mir sein nocha froah gewessn, daßmo ibon Südgrad osteign gekennt hobm (der unvoständlichoweise et in die Londkortn ingezeichnt isch, obwohl bessa und sichra). Obm unkemm, wor die Sicht leido nimma sofl unendlich, dofiar hobm sich obo obwechsln deckt in olla Richtungen die Gipfl gezaag.
Do Obstieg wor nocha die gonzn Staane va wundoschiana Herbstforbm geprägt.
Wosso & Moos
02.10.2010: An den leicht regnerischn Tog seinmo va St. Vigil ins Rautol spaziert, entlong van an nettn Bachl, des mi mit seina Spielerein foscht zin Traam gebrocht hot.
Amol a bißl mehra, noa winiga, Moos unto Wosso, Moos ibo Wosso ... a Geblubbre do, a poor bunta Staane zem ... aanfoch schian!
Schneabigo Nock (3.358 m)
Mit Iboschreitung va do Rieserfernerhitte zi do Kasslerhitte
22.07.2010: Van Parkplotz vorn Gelltol seinmo in do Friah gstartn. Do Aufstieg ibo die Gelltololbe isch bis kurz vor do Rieserfernerhitte olm im Schottn gewessn, die Gipfl dummedumm van Unfong un in do Sunne. Bis af a poor Kiah af do Olbe, seinmo allaan untowegs gewessn, zwischn unfongs Wold, donoch bäriga saftiga Olmwiesn mit viel Wosso und Bachlan und gaaling la me Staane und Geröll ... und ba die leschtn Grosbischlan a poor Schof, wos bessa Plöckn kenn as wia do Walter :-)
Do obrane Rond van Schneafeld zwischn Fernaköpfl und Schneabigin isch hoir gonz waach gewessn, desweign seinmo sem uhne Steigeisn umme kemm. Vor man zi den Schneafeld kimp, muiß man no ibo an geröllign Taal ibo Staanplottn (a bißl auzipassn) und donoch no a Passage ibo an mitn Kettn gsichortn Obschnitt.
Van Gipfl aus siecht man de beeindruckndn Gletschafeldo und poor Gipfl in do Ferne, de wosn et va Quellwolkn vodeckt worn. Do Obstieg richtung Kasslerhitte volaaft bärig ibon Grat. Wärnd afn Herweg ols perfekt markiert isch, isch ban Owärtsgiahn longe ka Markierung zi sächn und so muiß man awin genau schaugn wo man get.
Ban Schneafeld (wosmo seinozeit et ibowundn hobm) sein die Steigeisn zin Einsotz kemm - sischt wars gor et gong. Gaaling siecht man unte a poor netta Gletschaseablin und je weita daßmo ochn kemm sein, umso mehra isch wiedo ibro Wosso daher gerunn.
Ba do Kasslerhitte hots nocha no a Mittogessn gebm und donoch seinmo wiedo ogn zin Auto. Insgesomt a richtig bäriga Runde mit viel voschiedna Eindrücke: viel Grian, Wosso, Staane, Eis, Felsn, Schnea, ...
Schwargeburtn
Im doppltn Sinn
Des Johr bin i hort in die Gänge kemm, sowohl mit Fotografiern as wia - und bsundos - mitn Aktualisiern va der Homepage.
Hon schun iboleg, ob i se et instompfn soll, obo do aanzige mir bekonnte reglmäßige Bsuicha va meindo Seite hot et augebm, ordnlich zi pemsn.
Die zwaate Schwargeburt ist do Schneabige Nock. Des isch mei dritto Onlauf. S'leschte Johr sein do Walter und i bis zin Fernerköpfl kemm und hobm nocha vor die Eisfeldo van Schneabigin umgedrahnt, weilmo kaana Steigeisn ghob hobm. Vor vieeele Johr (ca. 15) hon i amol gewellt mitn Hugo undn Gerold va Rein aus augn giahn und sem hobmo a vorn Schneafeld va do sem Seite gemiaßt umdrahn - olm weil kaana Steigeisn.
Desmol hon i des zin Onloß genumm, um in Tog dovor no schnella poor zi kaafn und so hots desmo gepaßt.