Foto-Albm 2008
Schneamando und Schneafraun
10.12.2008: A Traum fi jedis Kind - und mir zeihl ins do dozui. Heint hots in Boazn wiedo gschniebn und mir sein wiedo untowegs und hobms genossn! Ban Ebnicher hots afn 600. Rittngong van Walter (mit a bißl Vorspätung) an guitn frischn worm Epflstrudl gebm ... *hmmm*
... und ochawärschts an Erfrischung va obm :-)
I frei mi schun af die nächstn mo - es soll jo no 2 Toge weita schneibm.
Do Winto isch do!!!
Rittenwondrung mit Schnea - a seltna Gelegnheit
03.12.2008: Vor a poor Toge, in Freita 28. Novembo, seinmo afn Rittn gong, währnds ungheb hot zi schneibm. Es wor richtig bärig und viar kemm ischmo unto die Flockn wia wenn Weihnochtn war.
Heint hobmo die Summe van a poor Schneatoge gsächn: Ban Seeberhof bis knopp unto die Knia, obn in Maria-Himmelfohrt (do Walter isch gonz augn) bis ibo die Knia. A Haufe Baame und Äschte hobm in die Schneamassn nochgebm und sich ins in Weg geleg.
Herbstimpression
Blick ibo Sindelsdorf und Kesselberg
03.11.2008: Die Wiesn no richtig sott grian, die Baame gelb und se olwa wianiga, weil nimma viel Laab umma isch. Do Blick get ibo Sindelsdorf grode zin Kesselberg (links do Jochberg, rechts do Herzogstond) und im Hintogrund u.a. die Sojernspitze und einigis van Karwendl isch a zi sächn. Die Feichtigkeit van Moos hintoloßt ihra Spurn (et daß aans maant, des war Smog odo so) und wersch in do Nocht zi dichtn Nebl.
Gelbo Marienkäfo?
JO! Do Sechzehnfleckige
S'Rätsl isch gelöst
08.01.2009: A Donkschian an in Detektiv Florian T., dermo heint die Ontwort af a Froge geliefort hot, de mo schun longe ka schloflosa Nocht me gekoschtn hot. Es isch do Sechzehnfleckige Pilz-Marienkäfo und olls Weitre dribo konnman af Wikipedia nochläsn.
Odo an Asiate? Odo an Albino?
03.11.2008: Der gelbe Käfo ischmo ban an Spaziergong zwischn Penzberg und Sindelsdorf ibon Weg gerennt. Va do Form und Gräaße wia a Marienkäfo, obo die Forbe isch schun interessant. Wer hotten so eppas schun amo gsächn odo waß wos des genau isch? Odo ischs aanfoch a Laune der Natur, wos den Käfo vogilbt hot?
Des isch a richtigo!
11.11.2008: Stott heint ban Laternenumzug mit zi giahn, honnimo den vomeintlichn gelbm Marienkäfo amo mit a poor Foto va sichra Marienkäfo voglichn. Eigntlich siech i la ban Kopf Untoschiede ... sischt isch die Form und a die Haxn ziemlich ähnlich.
Des Foto drobo isch an Auszug aus aan va meina schianstn Foto. Foto vogräaßon ...
Schlern - Tierser Alpl
Schiana Herbstwondrung
24.10.2008: Va Weißlahnbod im Tierser-Tol sein do Walter und i ibo die Bärnfolle in Richtung Schlern gstartn. Stott an Bär hobmo an hilzorn Wolf gsächn, der die Zände fletscht; onscheinend recht unaufällig, weil do Walter isch dron vobeirennt und siechtn s'erschte Mo in den Album :-) Ba do Querung ibo do Sesslschweige ischs no recht kuihle gewessn, obo bold hot sich do Hoachnebl vozochn und die Sunne hot ins gewärmp. Tolla Aussicht van Pez (Brenta, Adamello, Ortlergebiet, Texlgruppe, ibon Olpnhauptkomm umme bis zi die Rieserferner und van Ostn hot ins die Hohe Gaisl die längste Zeit zuigewinkt). Van Tierser Alpl afn Molignonpoß ischs schun ziemlich wintolich gewessn, obo ka Problem vi ins. Ogn an do Grasleitenhütte vobei und außn ibos Tschamintol (Foto: leschte Pause am "Rechten Leger").
Monte Pelmo
Sicht bis zi die Berge va Istrien
23.07.2008: A idealo Tog fin Walter und mi fi den Berg. Es wor zwor ziemlich windig und kolt (außo afn Gipfl), obo a gewaltiga Sicht: im Südn hobmo die Adria und die Berge va Istrien gsächn. Sischt ischs a Berg, ders in sich hot und der absoluta Schwindlfreiheit und Trittsichoheit volong: is luftige Ball-Band und a obm augn sein a poor Stelln, wo man die Hände außa tian muiß van Sock.
Fanesgebiet
Schneaschuichwondrung
12.03.2008: mit Theresia und Walter - wiedramo eppas Gscheids, stott Orbatn :-) Traumhoft wors im Reich der Fanes, noaumo richtig tiaf Winto, teilweise windig und a bärigo noio Schnea. Gonz nachnd am Neina, Zeihna, Heilig-Kreiz-Kofl. In leschtn hobmo als möglicha Gipfkrönung im Augo ghob (gsächn hobmon jo decht guit), obo mit die Schneaschuiche wors af insodo Route kaum ze dorichtn. Und ba de Bildo kaum ze glaabm: kurz vor Pederü hots ins no ingewaacht.
Felszeichnungen
aus do Bronzezeit im Valcamonica
30.09.2008: Felszeichnung isch des kaana, obo dofiar a wundoschiando Eindruck va do Natur. Do Jürgen, Johannes und i sein noch Capo di Ponte in do Valcamonica gfohrn, um Felszeichnungen aus do Bronzezeit unzischaugn. Beeindrucknd wos noch so longo Zeit no in die Felsn zi sächn isch.
Postmeisteralm
02.08.2008: Noch longo Zeit wiedramo a kurza, netta, lustiga, untoholtsoma Wondrung mitn Meisto Jürgen. Nochdems die Nocht dovor volle gschifft hot, hobm sich so longsum die Nebl vozochn.
1. Sellaturm
Mei erschta alpina Klettotour
15.07.2008: Mitn Walter und do Silvia hon i die erste richtige Klettotour gemocht. Und zwor die Kaminführe afn 1. Sellaturm.
Bergjosl 2008
Odo va Mittewold bis Windlahn im Sarntol
10.06.2008: S'leschte Stuck bis zin Bergjosl sanmo desmo zwor mitn Auto gfohrn, obo dechto wors a bärigo, feichto, schaurigo Tog. Do sein 2 Eindrücke: Blauo-Himml-Blick af die Flaggerschorte und donoebm af die Fortschellschorte, kurz bevormo s'erschte Mo in Regn und Schaur kemm san.
Drei Zinnen Lauf
In Sunnta, 14. Septembo 2008, hobm do Walter und i is zwaate mo ban Drei Zinnen Lauf mitgetun. Die gonze Woche schun seinmo gonz sponnt weignin Wetto gewessn, weilse schun in Munta Letzwetto fin Sunnta prophezeit hobm ... und so ischs nocha leido a kemm. Desweign bin i gonz froah gewessn, daßze s'Renn af die Alternativstrecke afn Helm volegg hobm. Ze Regn hots zwaa Stundn vorn Start augheart und nocha ischs truckn bliebm.
Halloween :-)
29.10.2008: Schaug amo wia bärig der tolle Kirbis leichtit. Hot der eppa a Loch im Kopf? :-) Den hot do Flori vor genau 2 Johr "gschnitzlt". Do Künstla holtit sich dezent im Hintogrund.
Nois Layout
25.10.2008: Leschthin bin i af YAML gstoaßn und des hotmo van Layout und seina Meiglichkeitn glei gfoll; vor ollm, weils unto olla Browser gleich ausschaugn sollat - hoffmo, daßz des a noch meina Unpassungen no tut. Desweign hon i domit ungheb, mei Seite ze iboorbatn und so schaugs itz aus. Es wersch ollodings no awin brauchn, bis i olla Seitn und Albm ungepaßt hon. Desweign bitte um awin Voständis, wenns no awin drunto und dribo get. Byebei - Martin
Sunnuntogong
Den tolln Sunnenuntogong hon i im August in Wasserburg ban Bodnsea fotografiert.
